Reuters-ը հաղորդում է, որ Միացյալ Նահանգները և Իրանը համաձայնության են եկել 300 միլիարդ դոլարի մասնավոր ներդրումային հիմնադրամի ստեղծման շուրջ:
Հիմնադրամը կֆինանսավորվի բացառապես մասնավոր կապիտալով: Հավանական ներդրողների թվում են ԱՄՆ-ի, Պարսից ծոցի, Ասիայի, Հարավային Ամերիկայի և Աֆրիկայի ընկերությունները: Մեխանիզմը կգործարկվի միայն վերջնական համաձայնագրի ստորագրումից հետո: Հաջորդ 60 օրվա ընթացքում կողմերը նախատեսում են որոշել հիմնադրամի կառուցվածքը և էներգետիկայի, լոգիստիկայի, տրանսպորտի ու արդյունաբերության ոլորտներում նախագծեր մշակել:
Reuters-ի տվյալներով՝ Իրանը սկզբում Միացյալ Նահանգներից պահանջել է 400 միլիարդ դոլարի փոխհատուցում պատերազմական վնասի համար, սակայն կողմերը կանգ են առել տարածաշրջանային և մասնավոր ֆինանսավորման ներգրավման շուրջ:
Հիշեցնենք, որ ԱՄՆ փոխնախագահ Ջեյ Դի Վենսը անդրադառնալով Իրանի վերականգնման համար նախատեսվող 300 միլիարդ դոլարի հիմնադրամին՝ նշել էր, որ Թեհրանը կարող է մուտք ստանալ դեպի այդ միջոցները միայն գործարքի պայմանները լիարժեք կատարելու դեպքում, և հավելել, որ այդ հիմնադրամը ֆինանսավորվելու է Պարսից ծոցի երկրների, այլ ոչ թե Միացյալ Նահանգների կողմից։
«Եթե իրանցիներն իրենց լավ պահեն, եթե լինի պատժամիջոցների թուլացում, մենք կխրախուսենք այլ երկրներին՝ բայց ոչ մեզ, ներդրումներ կատարել Իրանում»,- նշել էր նա։
Հետևեք մեզ տելեգրամում
