Հունիսի 18-ի գիշերն Ուկրաինան պատերազմի մեկնարկից ի վեր ամենախոշոր ԱԹՍ գրոհն է իրականացրել ՌԴ դեմ։ Հարձակումների հետևանքով Մերձմոսկվայում տուժել է 17 մարդ։ Այս մասին հայտնում է BBC-ին:
Ըստ ՌԴ ՊՆ-ի՝ 24 ժամում 1000 ուկրաինական ԱԹՍ են խոցել: Անօդաչուների հիմնական թիրախն է եղել Մոսկվայի Կապոտնյա շրջանում գտնվող և «Գազպրոմնեֆտ»-ին պատկանող նավթավերամշակման գործարանը։ Սա վերջին երկու օրվա ընթացքում գործարանի վրա իրականացված երկրորդ հարձակումն է։
Հարձակման պատճառով Մոսկվայի բոլոր օդանավակայանները ժամանակավորապես դադարեցրել են աշխատանքը։ Ըստ ռուսական աղբյուրների՝ չեղարկվել կամ հետաձգվել է 527 չվերթ, իսկ ամենաբարդ իրավիճակը ստեղծվել է «Շերեմետևո» օդանավակայանում։ Շուրջ 50 ինքնաթիռ հարկադրված վայրէջք է կատարել Նիժնի Նովգորոդում։
Նույն գիշերը Ռուսաստանի զինված ուժերը լայնածավալ հարձակում են իրականացրել Ուկրաինայի տարածքի ուղղությամբ՝ արձակելով 7 բալիստիկ հրթիռ (Իսկանդեր-Մ/Ս-400) և 239 տարբեր տեսակի ԱԹՍ:
Ուկրաինայի նախագահ Վլադիմիր Զելենսկին, մեկնաբանելով Մոսկվայի դեմ հարձակումը, այն որակել է «լիովին արդարացի պատասխան ռուսական ագրեսիային»։ «Եթե կրակի մեջ է Կիևը, կրակի մեջ կլինի նաև Մոսկվան: Սա մեր մարտիկների աշխատանքի հերթական կարևոր արդյունքն է այն օբյեկտների ուղղությամբ, որոնք ապահովում են ռուսական ռազմական մեքենան։ Ժամանակն է այս պատերազմն ավարտել, և Ռուսաստանը պետք է անհրաժեշտ դիվանագիտական քայլեր ձեռնարկի»,- հայտարարել է Զելենսկին։
Հիշեցնենք, որ ավելի վաղ Զելենսկին ՌԴ նախագահին առաջարկել էր հանդիպել և քննարկել պատերազմին վերջ տալու հարցը:
Հետևեք մեզ տելեգրամում
