Թուրքական լրատվական կայքերը հայտնում է, որ Թուրքիայի Իգդիր նահանգում նախատեսվող 50 կիլոմետրանոց շրջանցիկ ճանապարհի նախագիծը վերանայվել է՝ Հայաստանի հետ սահմանային անցակետի հնարավոր բացման և, այսպես կոչված Զանգեզուրի միջանցքի թեմայի օրակարգ գալու պատճառով։
Հրապարակումների համաձայն՝ Թուրքիայի տրանսպորտի և ենթակառուցվածքների նախարարության Մայրուղիների գլխավոր վարչության կողմից մշակված նոր երթուղին նախագծվել է՝ հաշվի առնելով Հայաստանի հետ սահմանային անցակետից ակնկալվող բեռնափոխադրումները։
Նշվում է, որ ծրագրի նպատակն է ծանր բեռնատարների երթևեկությունը դուրս բերել Իգդիր քաղաքի կենտրոնից։ Ըստ նախագծի՝ Նախիջևանից և Հայաստանից ժամանող բեռնատարները Քարաքոյունլու հանգույցից կուղղորդվեն դեպի շրջանցիկ ճանապարհ։
Իսկ շրջանցիկ ճանապարհը կկապվի նաև երկաթուղային ենթակառուցվածքների հետ։ Նախագծով նախատեսվում է, որ Քարաքոյունլուի երկաթուղային կայարան հասնող բեռները հետագայում բեռնատարներով կտեղափոխվեն Հայաստան, իսկ Քարաքոյունլուն կձևավորվի որպես կարևոր լոգիստիկ կենտրոն։
Հիշեցնենք, որ Հայաստան-Թուրքիա հարաբերությունների կարգավորման շրջանակում կողմերը նախկինում հայտարարել էին երրորդ երկրների քաղաքացիների և դիվանագիտական անձնագիր ունեցող անձանց համար հայ-թուրքական սահմանի բացման, ինչպես նաև սահմանային անցակետի շահագործման համար անհրաժեշտ ենթակառուցվածքների նախապատրաստման վերաբերյալ ձեռք բերված պայմանավորվածությունների մասին։ Սակայն այդ համաձայնությունները մինչ օրս չեն իրականացվել։
Հետևեք մեզ տելեգրամում
