Ֆրանսիայում շուրջ երկու շաբաթ տևած ծայրահեղ շոգի ֆոնին ջրային ավազաններում զովանալու փորձերը ողբերգական հետևանքներ են ունեցել. հունիսի 19-ից ի վեր լճերում, գետերում, ջրանցքներում և այլ բաց ջրերում լողալու ընթացքում ավելի քան 90 մարդ է խեղդվել։ Այդ մասին հայտնել է երկրի սպորտի նախարար Մարինա Ֆերարին։
Նախարարի խոսքով՝ այս ցուցանիշը չափազանց մտահոգիչ է։ Նա նշել է, որ վերջին օրերին խեղդվելու դեպքերի թիվը որոշակիորեն նվազել է, ինչը պայմանավորված է նրանով, որ ամենաբարձր ջերմաստիճանների ժամանակ քաղաքացիները նախընտրել են մնալ ավելի զով վայրերում։
Ֆերարին ընդգծել է, որ հատկապես շոգի առաջին օրերին զոհերի թվում մեծ թիվ են կազմել երիտասարդները։ Նրա խոսքով՝ զոհերը որևէ կոնկրետ խմբի չեն պատկանում, սակայն փոքրահասակ երեխաները շարունակում են մնալ առավել խոցելի, ուստի նրանք չպետք է լողան առանց մեծահասակների հսկողության։
Նախարարը նաև նշել է, որ երիտասարդները հաճախ լողում են չվերահսկվող ջրանցքներում և այլ վտանգավոր վայրերում, ինչի պատճառով անհրաժեշտ է զարգացնել բաց ջրերում անվտանգ լողալու ուսուցումը։ Ըստ նրա՝ խեղդվելու դեպքերի մեծ մասը գրանցվել է ոչ թե լողավազաններում, այլ լճերում և այլ բնական ջրային ավազաններում։
Նշենք, որ հունիսի կեսերից Ֆրանսիան գտնվում է ծայրահեղ շոգի ազդեցության տակ։ Բարձր ջերմաստիճանների պատճառով հիվանդանոցներում ծանրաբեռնվածությունն աճել է, իսկ հունիսի 26-ին միայն Փարիզում մեկ օրվա ընթացքում շոգի հետևանքով մահացել էր 109 մարդ։
Հետևեք մեզ տելեգրամում
