Ֆրանսիայի և Ռուսաստանի առաջնորդները երեկ հեռախոսազրույց են ունեցել, որի ընթացքում քննարկել են նաև ղարաբաղյան խնդիրը:
«Վլադիմիր Պուտինը, նախագահ Էմանյուել Մակրոնի խնդրանքով, ներկայացրել է Լեռնային Ղարաբաղի շուրջ նոյեմբերի 9-ին և հունվարի 11-ին ձեռք բերված եռակողմ համաձայնությունների կատարման ընթացքը», – հաղորդում է Ռուսաստանի նախագահական նստավայրը:
Ու թեև հայ – ադրբեջանական սահմանին կրակոցները մի քանի շաբաթ է` չեն դադարում, երկու կողմում էլ կան զոհեր ու վիրավորներ, Կրեմլը պնդում է` Մակրոնի և Պուտինի զրույցի ընթացքում «արձանագրվել է, որ տարածաշրջանում իրավիճակը ընդհանուր առմամբ կայուն է»:
Ելիսեյան պալատը, մինչդեռ, այլ գնահատական է տալիս, ընդգծելով. – «Նախագահ Մակրոնը մտահոգություն է հայտնել Հայաստանի և Ադրբեջանի միջև լարվածության վերսկսման կապակցությամբ»:
Վլադիմիր Պուտինն, իր հերթին, փոխանցել է Մակրոնին, թե «քայլեր են ձեռնարկվում Հարավային Կովկասում տնտեսական ու տրանսպորտային կապերը վերականգնելու և բնակչության մարդասիրական կարիքները հոգալու ուղղությամբ», – նշում է Ռուսաստանի նախագահական նստավայրը` առանց հավելյալ մանրամասների:
Հետևեք մեզ տելեգրամում
