Սաուդյան Արաբիան նախատեսում է Իրանի հետ բանակցությունների հինգերորդ փուլն անցկացնել՝ չնայած նախորդ փուլերում «առարկայական առաջընթացի» բացակայությանը: Այս մասին հայտարարել է Սաուդյան Արաբիայի արտգործնախարար Ֆայսալ բըն Ֆահրան Ալ-Սաուդը Մյունխենում կայացած անվտանգության վեհաժողովին:
«Եթե մենք նկատենք առարկայական առաջընթաց, ապա այո, մերձեցումը հնարավոր է: Մինչ այժմ մենք դա չենք տեսել»,- շեշտել է արտգործնախարարը:
Սաուդցի դիվանագետը նշել է, որ եթե 2015 թվականի Իրանի միջուկային համաձայնագրի շուրջ համաձայնության հասնեն, ապա դա պետք է լինի «սկզբնակետ, այլ ոչ վերջնակետ»՝ լուծելու տարածաշրջանային խնդիրները:
«Դա Իրանում մեր հարևաններից պահանջելու է լուրջ ցանկություն առկա խնդիրները լուծելու համար…Մենք հուսով ենք, որ ծանրակշիռ ցանկություն կա՝ գտնելու նոր գործելաոճ», – ասել է նա:
Նշենք, որ Սաուդյան Արաբիան խզել էր Իրանի հետ հարաբերությունները 2016 թվականին այն բանից հետո, երբ Թեհրանում նրա դեսպանատան դիմաց ցուցարարներ էին հավաքվել՝ մեղադրելով Ռիյադին սաուդցի շիա կրոնական առաջնորդին մահապատժի ենթարկելու համար: Տարածաշրջանային տերությունների միջև լարվածության պատճառներից է նաև Եմենի պատերազմը: Սաուդյան Արաբիան արաբական կոալիցիայի գլխավորությամբ պայքարում է հուսիների դեմ, որոնք վայելում են Իրանի աջակցությունը: 2016 թվականից ի վեր երկկողմ լարվածության հաղթահարման համար Սաուդյան Արաբիայի և Իրանի միջև բանակցությունների չորս փուլեր են կայացել Իրաքի միջնորդությամբ։ Վերջին երկու փուլերը կայացել են ընթացիկ տարվա սեպտեմբերին Բաղդադում Սաուդյան Արաբիայի պետքարտուղար Ադել Ալ-Ջուբեյրի և Իրանի ազգային անվտանգության բարձրագույն խորհրդի քարտուղար Ալի Շամխանիի միջև Իրաքի վարչապետ Մուստաֆա Կազեմիի միջնորդությամբ։ Իսկ դեկտեմբերի 27-ին Աբդոլլահիանը հայտարարել էր, որ Արաբիայի հետ բանակցությունների հինգերորդ փուլի մեկնարկի համար պատրաստական աշխատանքներ են տարվում։
Իրանական կողմը պարբերաբար հայտարարում է, որ պատրաստ է Սաուդյան Արաբիայի հետ կարգավորել դիվանագիտական հարաբերությունները, եթե վերջինս ցուցաբերի անհրաժեշտ քաղաքական կամք՝ շարունակելու բանակցությունները «փոխըմբռնման և փոխադարձ հարգանքի» միջավայրում: Իսկ Իրանի ԱԳՆ խոսնակ Սայիդ Խաթիբզադեն դեռևս սեպտեմբերին հավաստիացնում էր, որ իրանա-սաուդական բանակցություններում գրանցվել է «նշանակալի առաջընթաց»:
Հետևեք մեզ տելեգրամում
