Իրանի նախագահ Էբրահիմ Ռայիսին ՌԴ և Թուրքիայի նախագահների հետ եռակողմ հանդիպմանը ունեցած ելույթում ընդգծել է Աստանայի ձևաչափի պահպանման անհրաժեշտությունը:
Նա շեշտել է Սիրիայի տարածքային ամբողջական, ինքնիշխանության պահպանման և սիրիական հակամարտության՝ ներքին երկխոսությամբ կարգավորելու անհրաժեշտությունը:
«Սիրիական ճգնաժամի սկսվելուց անցել է 11 տարի, Իրանը դեռ հավատացած է, որ սիրիական ճգնաժամի միակ լուծումը քաղաքական է, և ռազմական գործողությունները ոչ միայն անարդյունավետ են, այլև կվատթարացնեն իրավիճակը»,- ասել է Ռայիսին։
Դատապարտելով Սիրիայի նկատմամբ ԱՄՆ միակողմանի պատժամիջոցները՝ Ռայիսին նշել է, որ Իրանը շարունակելու է աջակցել Սիրիայի կառավարությանը, ընդ որում՝ էլ ավելի շատ:
«Հարևան երկրների և Սիրիայի սահմաններին կայունություն և անվտանգություն հաստատելու միակ միջոցը այս երկրի բանակի հզոր ներկայությունն է սահմաններին և համագործակցությունը հարևան կառավարությունների հետ»,- հավելել է Իրանի նախագահը:
Նա ընդգծել է, որ ամերիկյան ուժերը պետք է դուրս գան Սիրիայի տարածքից:
«Ամերիկյան ռեժիմի օկուպացիոն ուժերի անօրինական ներկայությունը դարձել է Սիրիայի և տարածաշրջանի ապակայունացնող գործոն։ Անօրինական ռազմակայանների ավելացման ժամանակ ԱՄՆ-ն թալանում է բնական ռեսուրսները, հատկապես սիրիական նավթը, և ես ընդգծում եմ, որ այս երկրի ուժերը պետք է դուրս գան ամբողջ տարածաշրջանից, այդ թվում՝ Սիրիայից»,- հայտարարել է Ռայիսին:
Հետևեք մեզ տելեգրամում
