Վրացական ընդդիմադիր «Միացյալ ազգային շարժում» կուսակցության առաջնորդ Թինա Բոկուչավան Միխեիլ Սաակաշվիլիի ազատազրկման դատական վճիռների ֆոնին մեղադրել է նախկին նախագահ Սալոմե Զուրաբիշվիլիին վերջինիս ժամանակին ներում չշնորհելու համար։
«Սալոմե Զուրաբիշվիլին Իվանիշվիլիի ռուսական ռեժիմի հետ կիսում է պատմական այս անարդարության պատասխանատվությունը։ Չնայած Սալոմե Զուրաբիշվիլիին ուղղված բազմաթիվ կոչերին, այդ թվում՝ միջազգային դերակատարների, մասնավորապես Եվրախորհրդարանի կոնկրետ կոչերին, նա չօգտագործեց ներման սահմանադրական գործիքը, որը հասանելի էր իրեն։ Նրա հիմնական փաստարկն այն էր, որ դա չի երաշխավորում նախագահ Սաակաշվիլիի ազատությունը։ Այսօր պարզ դարձավ, որ ներում շնորհելու նրա որոշումը բացի բարոյաքաղաքական հայտարարությունից, որի մասին բազմիցս խոսել ենք, կունենար նաև գործնական հետևանքներ։ Այսօր Միխեիլ Ջինջոլիան չէր կարողանա կիրառել գումարման (ազատազրկման ժամկետների-հեղ․) սկզբունքը, քանի որ Սալոմե Զուրաբիշվիլիին ներում շնորհելու ակտը չեղյալ կհայտարարեր ինչպես մյուս պատիժները, այնպես էլ ազատազրկման համապատասխան ժամկետները»,-հայտարարել է Բոկուչավան։
Նշենք, որ Վրաստանի նախկին նախագահը մի քանի օրվա տարբերությամբ դատական տարբեր գործերի շրջանակներում դատապարտվել է 12 տարի և 6 ամիս ազատազրկման։ Նախնական տվյալներով Սաակաշվիլին բանտում կանցկացնի մինչև 2034թ․ ապրիլի 1-ը, ժամկետը կարող է փոփոխվել, քանի որ ևս մեկ դատական գործ դեռևս ընթացքի մեջ է։ Սալոմե Զուրաբիշվիլիի նկատմամբ ընդդիմադիր դաշտում բողոքի մեծ ալիք է բարձրացել Սաակաշվիլիի դատավճիռների ֆոնին։ Ինքը Զուրաբիշվիլին օրեր առաջ հայտարարել էր, թե «իր նպատակը երբեք ընդդիմությանը միավորելը չի եղել»։
Հետևեք մեզ տելեգրամում
