Ռուսաստանի նախագահ Վլադիմիր Պուտինը հայտարարել է, որ Հայաստանի՝ Եվրամիությանը անդամակցելու ծրագրերը հատուկ դիտարկում են պահանջում։ Նա նաև նշել է, որ ճիշտ կլիներ՝ Հայաստանը շուտ կողմնորոշվեր ԵՄ-ԵԱՏՄ հարցում, և «քաղաքակիրթ ապահարզան լիներ»։
«Մենք մեկ անգամ չէ, որ քննարկել ենք դա վարչապետ Փաշինյանի հետ, և առանձնահատուկ ոչինչ չենք տեսնում: Ես նրան արդեն մի քանի անգամ ասել եմ և այժմ կարող եմ հրապարակայնորեն կրկնել՝ մենք կսատարենք այն ամենը, ինչ շահավետ է հայ ժողովրդին: Հայ ժողովրդի հետ մենք հատուկ հարաբերություններ ունենք դարեր շարունակ: Եվ եթե հայ ժողովրդին շահավետ է այս կամ այն որոշումը, խնդրեմ, մենք դեմ չենք լինի»,-Կրեմլի պաշտոնական կայքէջի փոխանցմամբ՝ շաբաթ օրը լրագրողների հարցերին ի պատասխան ասել է Պուտինը:
Պուտինը նաև կարծիք է հայտնել, որ Հայաստանը կարող է հանրաքվե անցկացնել՝ ընտրելու Եվրամիության կամ Եվրասիական տնտեսական միության միջև։ Նրա խոսքով՝ Հայաստանը ներկայումս ԵԱՏՄ շրջանակներում զգալի առավելություններ է ստանում։ «Դա մեր գործը չէ, բայց սկզբունքորեն տրամաբանական կլիներ հանրաքվե անցկացնել և հարցնել Հայաստանի քաղաքացիներին՝ ինչպիսի՞ն կլինի նրանց ընտրությունը: Դրան համապատասխան էլ մենք ևս համապատասխան եզրակացություններ կանեինք և կգնայինք փափուկ, ինտելիգենտ և փոխշահավետ ապահարզանի ճանապարհով»,-ասել է ՌԴ նախագահը:
Այս հայտարարությունները հնչել են այն ֆոնին, երբ Հայաստան-ԵՄ առաջին գագաթնաժողովից հետո վարչապետ Նիկոլ Փաշինյանը չի հստակեցրել՝ Երևանը պատրաստվում է ԵՄ-ին անդամակցության պաշտոնական հայտ ներկայացնել, թե ոչ։ Փաշինյանը հայտարարել էր, որ եթե Հայաստանը ԵՄ անդամ դառնա, դա կլինի դրական զարգացում, իսկ եթե ոչ՝ երկիրը միևնույն է կշարունակի բարեփոխումները եվրոպական չափանիշներին համապատասխան։
Հետևեք մեզ տելեգրամում
