Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսին հայտարարել է, որ Իրանի միջուկային ծրագիրը վերահսկելու համար անհրաժեշտ է ներդնել ստուգումների չափազանց խիստ համակարգ և գործակալությանը տրամադրել լիարժեք հասանելիություն։ Այս մասին հայտնում է «Ալ-Ջազիրան»:
Գրոսին ընդգծել է, որ Թեհրանի կողմից միջուկային զենքի ստեղծման կանխումը ԱՄՆ-ի հետ կնքված հրադադարի հուշագրի առանցքային նպատակն է։ Չնայած Իրանը շարունակում է պնդել, որ իր ծրագիրն ունի բացառապես խաղաղ, քաղաքացիական նպատակներ, ՄԱԳԱՏԷ-ի ղեկավարը նշել է, որ միայն հայտարարությունները բավարար չեն, և կողմերին կոչ է արել հնարավորինս սեղմ ժամկետներում անցնել գործնական ստուգումների։
Նշենք, որ Իրանի միջուկային օբյեկտների տեսչական ստուգումների հարցը Վաշինգտոնի և Թեհրանի միջև ընթացող բանակցություններում հիմնական տարաձայնություններից է: Իրանը գործակալության հետ համագործակցությունը դադարեցրել էր 2025թ. հունիսին տեղի ունեցած 12-օրյա պատերազմից հետո, երբ ԱՄՆ-ն ու Իսրայելը հարվածներ հասցրեցին երկրի միջուկային կենտրոններին։ Թեև սեպտեմբերին իրանական կողմը թույլատրեց տեսուչների վերադարձը, սակայն մինչ օրս հասանելիություն չի ապահովել հենց ռմբակոծված օբյեկտներին, իսկ հարստացված ուրանի պաշարների ներկայիս կարգավիճակը դեռևս մնում է անհայտ։
Հետևեք մեզ տելեգրամում
