ՀՀ արտաքին գործերի նախարարի տեղակալ Վահան Կոստանյանը և ՀՀ էկոնոմիկայի նախարարի տեղակալ Արման Խոջոյանը Հաագայում մասնակցել են եվրոպական շուկա հայկական ծաղիկների արտահանման հեռանկարներին նվիրված կլոր սեղան-քննարկմանը։ Այս մասին հայտնել է ՀՀ արտաքին գործերի նախարարությունը։
Միջոցառումը կազմակերպվել է Նիդերլանդներում Հայաստանի դեսպանության նախաձեռնությամբ։ Քննարկմանը մասնակցել են Նիդերլանդների արտաքին գործերի և գյուղատնտեսության նախարարությունների ներկայացուցիչներ, հայկական և նիդերլանդական ծաղիկ արտադրող, լոգիստիկ և բրոկերային ընկերությունների, ինչպես նաև «Royal Flora Holland» ծաղկի աճուրդի ներկայացուցիչներ։
Քննարկման ընթացքում անդրադարձ է կատարվել եվրոպական շուկա հայկական ծաղիկների արտահանման հնարավորություններին, ոլորտում երկարաժամկետ և փոխշահավետ համագործակցության ձևավորմանը, ինչպես նաև հնարավորինս մեծ թվով հայկական ջերմոցային տնտեսությունների ներգրավմանը արտահանման գործընթացներում։
Կողմերը քննարկել են նաև ոլորտի զարգացմանն ուղղված պետական աջակցության ծրագրերը և Հայաստանի կառավարության կողմից տրամադրվող օժանդակության մեխանիզմները։
Այցի շրջանակում Վահան Կոստանյանը և Արման Խոջոյանը այցելել են նաև «Royal Flora Holland»-ի գլխավոր գրասենյակ, ինչպես նաև Նիդերլանդների երկու խոշոր ծաղկաբուծական ընկերություններ։ Նրանք տեղում ծանոթացել են ծաղիկների աճուրդների կազմակերպման գործընթացին և քննարկել Հայաստանի ընկերությունների հետ համագործակցության ընդլայնման հնարավորությունները։
ՀՀ ԱԳՆ-ի գնահատմամբ՝ հանդիպումները միտված են հայկական արտադրանքի, մասնավորապես՝ ծաղկի արտահանման հնարավորությունների ընդլայնմանը եվրոպական շուկայում և նոր գործարար կապերի ձևավորմանը։
Հետևեք մեզ տելեգրամում
