Վրաստանի արտգործնախարար Մակա Բոճորիշվիլին Հունգարիայի խորհրդարանում ինքնիշխանության և միգրացիայի վերաբերյալ պանելային քննարկման ժամանակ հայտարարել է, որ 2022թ․ Եվրամիությանն անդամակցության դիմում ներկայացնելուց հետո Վրաստանը հայտնվել է մի իրավիճակում, երբ անհրաժեշտ է դարձել ակտիվորեն պայքարել ինքնիշխանության համար, քանի որ այս հարցը ձեռք է բերել գոյաբանական նշանակություն։
Ըստ Բոճորիշվիլիի՝ «ԵՄ-ին անդամակցության դիմում ներկայացնելուց հետո այս կարևոր հարցը վերածվել է քաղաքական ճնշման, ներքին գործերին միջամտության գործիքի, ինչը անընդունելի է»։
«Խորհրդային Միության փլուզումից ի վեր մենք եվրոպական կառույցները, և հատկապես Եվրամիությունը, համարել ենք մեր ինքնիշխանության պաշտպանության լավագույն երաշխավորը։ Ահա թե ինչպես ենք մենք տեսնում և ինչպես ենք ուզում տեսնել Եվրամիությունը։ Ահա թե ինչու մենք դիմեցինք Եվրամիությանը անդամակցության համար և ահա թե ինչու 2014 թվականին ստորագրեցինք Ասոցացման համաձայնագիր Եվրամիության հետ։ Վրաստանը մի երկիր է, որը կիսում է եվրոպական արժեքները՝ արժեքներ, որոնք օրգանական են մեր հասարակության համար։ Երբ խոսքը վերաբերում է անվտանգությանը, ինքնիշխան որոշումների կայացումը կենսական նշանակություն ունի երկրում խաղաղություն, կայունություն և տնտեսական աճ ապահովելու համար։ Վրաստանի տնտեսական աճը տարեկան կազմում է 9.5%, ինչը տպավորիչ ցուցանիշ է Եվրոպայում: Այս արդյունքի հասնելը հիմնված է մեկ սկզբունքի վրա՝ մենք պետք է պաշտպանենք մեր երկրի ինքնիշխանությունը և չսպառնանք խաղաղությանն այս դժվար աշխարհաքաղաքական միջավայրում»,- հայտարարել է Բոճորիշվիլին։
Հետևեք մեզ տելեգրամում
