Բաքվի վերաքննիչ դատարանը օգոստոսի 6-ին կայացած նիստում անփոփոխ է թողել Արցախի ռազմաքաղաքական նախկին ղեկավարների և ապօրինի կերպով Բաքվում պահվող մյուս հայերի վերաբերյալ կայացրած դատավճիռները։ Այս մասին հայտնում են ադրբեջանական ԶԼՄ-ները:
Դեռևս փետրվարին Բաքվի զինվորական դատարանում ավարտվել էր Արցախի նախկին նախագահներ Արայիկ Հարությունյանի, Բակո Սահակյանի, Արկադի Ղուկասյանի, Պաշտպանության բանակի նախկին հրամանատար Լևոն Մնացականյանի, ՊԲ նախկին հրամանատարի տեղակալ Դավիթ Մանուկյանի, Արցախի ԱԳ նախկին նախարար Դավիթ Բաբայանի, ԱԺ նախկին նախագահ Դավիթ Իշխանյանի գործով այսպես կոչված «դատավարությունը»։
Արկադի Ղուկասյանից և Բակո Սահակյանից բացի՝ բոլորը դատապարտվել էին ցմահ ազատազրկման: Արկադի Ղուկասյանը և Բակո Սահակյանը դատապարտվել էին 20 տարվա ազատազրկման, քանի որ ըստ Ադրբեջանի քրեական օրենսգրքի՝ «մեղադրյալի» 65 տարեկանը լրացած լինելու դեպքում ցմահ դատավճիռ չի կայացվում:
Այս ապօրինի գործով անցնող մյուս հայերը՝ Մադաթ Բաբայանը, Մելիքսեթ Փաշայանը, Գարիկ Մարտիրոսյանը, Դավիթ Ալլահվերդյանը, Լևոն Բալայանը, Վասիլի Բեգլարյանը, Գուրգեն Ստեփանյանը և Էրիկ Ղազարյանը դատապարտվել էին 15-ից մինչև 19 տարվա ազատազրկման։
Հետևեք մեզ տելեգրամում
