2020թ. սեպտեմբերի 3-ին Քաղաքական դասընթացների Երևանի դպրոցը և Քաղաքական դասընթացների Թբիլիսիի դպրոցը համատեղ առցանց հանդիպում են անցկացրել։ Քննարկման ընթացքում ներկայացվել է Հայաստանի և Վրաստանի երիտասարդ առաջնորդների միացյալ ռազմավարական տեսլականը զբոսաշրջության՝ որպես տնտեսական աճի գործոնի, ինչպես նաև խտրականության և կոռուպցիայի դեմ պայքարի խնդիրների վերաբերյալ:
Մասնակիցներին ողջունել են Հայաստանում Եվրոպական միության պատվիրակության ղեկավար, դեսպան Անդրեա Վիկտորինը, Քաղաքական դասընթացների երևանյան դպրոցի տնօրեն Արմեն Զաքարյանը և Քաղաքական դասընթացների Թբիլիսիի դպրոցի տնօրինության ներկայացուցիչ Նանա Ցերցվաձեն:
Եվրոպական միության կողմից ֆինանսավորվող «Քաղաքականության մշակման հայ-վրացական հարթակ» ծրագիրը մեկնարկել է 2019 թ. օգոստոսին: Ծրագիրն ընդհանուր առմամբ Հայաստանից ու Վրաստանից ունեցել է 90 մասնակից՝ պետական տարբեր գերատեսչությունների, միջազգային կազմակերպությունների, քաղաքացիական հասարակության ներկայացուցիչներ, որոշում ընդունողներ, իրավաբաններ, հայտնի լրագրողներ, բիզնես մենեջերներ, հետազոտողներ և այլ երիտասարդ մասնագետներ: Տարբեր բնագավառների ներկայացուցիչների քննարկումներն օգտակար էին փաստերի վրա հիմնված, օբյեկտիվ և պրոֆեսիոնալ եզրակացությունների հանգելու առումով: Ծրագրի շրջանակներում Հայաստանում ու Վրաստանում տարբեր ձևաչափերով չորս միջոցառում է կազմակերպվել:
Հանդիպումների ընթացքում հայ և վրացի բարձրակարգ փորձագետներն ու մասնակիցները մշակել են առաջարկությունների փաթեթ՝ միտված Հայաստանի և Վրաստանի ռազմավարական տեսլականի իրականացմանը: Առանձնակիորեն կարևորվել է Հայաստանի և Վրաստանի միջև զբոսաշրջության մասին տեղեկացվածության աստիճանի բարձրացման հանգամանքը: Գործողությունների վերաբերյալ առաջարկությունները միտված են նպաստելու երկու երկրների բարեփոխումների գործընթացներին:
Հետևեք մեզ տելեգրամում
