ՌԴ ԱԳ նախարար Սերգեյ Լավրովը հայտարարել է, որ Երևանի և Մոսկվայի հարաբերությունները ներկայումս սերտ են, սակայն, միևնույն ժամանակ՝ ոչ պարզ։ Նրա խոսքով՝ Արևմուտքը փորձում է «իր ազդեցության տակ վերցնել» Հայաստանը, հայտնել է «ՏԱՍՍ»-ը։
«Մենք Հայաստանի հետ հարաբերություններ ունենք, և դրանք սերտ, դաշնակցային հարաբերություններ են, բայց միաժամանակ՝ ոչ պարզ՝ հաշվի առնելով, թե ինչպես է Արևմուտքը փորձում Հայաստանը, ինչպես նաև Անկախ Պետությունների Համագործակցության որոշ այլ անդամների, կրկին վերցնել իր վերահսկողության տակ, խզել Հայաստանի փոխշահավետ տնտեսական, առևտրային և ներդրումային կապերը ԱՊՀ և Եվրասիական տնտեսական միության իր գործընկերների հետ», – Նյու Դելիում ԲՐԻԿՍ-ի նախարարական հանդիպման արդյունքներով մամուլի ասուլիսի ժամանակ ասել է Լավրովը։
Բացի այդ՝ Լավրովը նշել է, որ Ռուսաստանի և Հայաստանի միջև հարաբերությունները քննարկելու հնարավորություն կստեղծվի մայիսի վերջին, երբ Ղազախստանում կկայանա Եվրասիական տնտեսական բարձրագույն խորհրդի գագաթնաժողովը։ Անդրադառնալով այն փաստին, որ ՀՀ վարչապետ Նիկոլ Փաշինյանը նախկինում նշել է, որ զբաղված է նախընտրական հարցերով և չի կարողանա մասնակցել ԵԱՏՄ ղեկավարների հանդիպմանը, Լավրովն ընդգծել է․ «Դա, իհարկե, ցավալի է, քանի որ լավ հնարավորություն կլիներ՝ քննարկելու այն հարցերը, որոնք այժմ կախված են օդում»,- հայտարարել է Լավրովը։
Հետևեք մեզ տելեգրամում
